الراحة النفسية
♥♥
كل زول /ة عنده ميول مختلفة عن غيرو في كل شئ، ولو ما كان إختلاف تام فهو بالضبط إختلاف كبير جدا،
الراحة النفسية دي عاملة زي الشجر
في ناس بعجبها ظل الشجرة
وناس تاني بعجبها شكل الشجرة ذاتها
ويمكن ناس تاني أغصان وفروع الشجرة
وما بعيد ناس بتفكر في ثمن الشجرة
وناس تفكر في عمر الشجرة وطولها
وناس تفكر في الحاجات الممكن تعملها بيها لو إتقطعت
وناس تاني ولا بفكرو في موضوع الشجرة وما أدراك ما شجرة
وناس تاني وناس تالت وناس رابع والموضوع جاري
برضو الناس كدا
ممكن زول يرتاح لشخص دون الباقي
الموضوع ومافيه أنو مافي مشاعر غبن أو ضغينة تجاه الآخرين بس لو سألت بجيك الرد أنو الشخص دا برتاح لي نفسيا
ممكن نلقي زول أو زولة بفضل إهتمامات ومواضيع معينة
إذا سألت أكيد الإجابة بتكون
أنا بلقي نفسي في الحاجات دي
الراحة النفسية دائما بتكون مقرونة بالأماكن
والأشخاص،والإهتمامات والميول والمواضيع الإنسان بلقي فيها نفسو،
غير كدا الزول بكون بساير المعايير
ومهما كانت المسايرة متوافقة نوعا ما،
بتكون ما حقيقية وفيها تكلف وتصنع كتير.
من أجل صحة نفسية أفضل للفرد والمجتمع
