بعد السلام وحلو الكلام .. نخش في الموضوع
طبعا زي ما عارفين #أزوال اتعملت عشانكم لكل زوله وزول وعشان عيونا وأطفالنا لما يكبرو يفتخرو انهم مستقلين وقاعدين في حقهم .. نحنا منكم وليكم وبدونكم ما بننجح ١٠ مرات .. وبدونكم ولا بنعرف وين أخطأنا ووين اتوفقنا.

الكنته وين كحال كل المشاريع التقنية الكبري في تحديات وصعوبات و مشكلات بتحصل في البدايات وحتي في النهايات ? والتطوير عملية مستمرة ما ليه نهاية .. عشان كده كل يومين التطبيقات المشهورة بترسل ليكم تحديث جديد وده بكون معالجة لمشكلة واجهت جزء من الناس او تحسين خدمة او اضافة ميزة جديدة وده طبعا بعد ما يجيهم feedbacks من المستخدمين .. ?
وده شئ طبيعي .. لكن الما طبيعي تشوفو المشكلة وما تكلمونا .. تشوفو تحديثنا وما تحدثو ?

اليوم 24.5.2022 عملنا عملية جراحية قاسية جدا علينا قد تحل مشاكل تعليق التطبيق بشكل كامل .. لكن ما متأكدين اذا نجحت أو لا .. الا تورونا انتو اذا نجحنا ولا نرجع نقراء تاني ?

هسه في البوست ده عايزنكم تفتونا فت تقيل
لكن قبل تفتونا وتكتبو المشكلة المواجهاكم طالبين منكم تعملو تحديث لاخر اصدار .. صعبه دي ? ايوه اخر اصدار .. اعفص هنا https://apps.azwal.com
صراحه كده في حاجات جميلة اضفناها بتحرمو روحكم ساكت ?

نمره اتنين
لو واجهتكم مشكلة بعد التحديث وما اظن تحصل بعد عملية الليلة دي .. زي مثلا التطبيق يعلق معاك او يقفل براهو لحظة تسجيل الدخول
قوم سوي كدا
ادخلو علي تلفونكم > الاعدادات > التطبيقات > ابحثو باسم azwal ادخلو علينا > امسحو ذاكرتنا ومعلوماتنا المخزنة حقت التطبيق من تلفونكم > كده التطبيق كانو نزل يادوب من المتجر يسو كدي ✋
بعد تعملو كده جربو افتحو تاني وسجلو دخولكم عادي
لو واجهتكم مشكلة عداكم العيب ?
تقومو هنا تورونا المشكلة والمشاكل الحصلت معاكم عشان نعالجها ليكم

بنحبكم والله وشغالين ليكم بحب كبير ?
وكلنا ثقة أزوال قريب جدا حتكون المنصة الاولي لكل السودانيين فاحسن احجزو بيتكم من هسه ورتبو وما تنسو تتفاعلو وتكونو صداقات جميلة عشان غيركم يلقي البيت عامر ويقعد
وادونا يومين راحة وعندنا ليكم مفاجاة من العيار الثقيل

#تعديل طبعا الفيس بو ك نزل الوصول لصفحتنا اكيد منشوراتنا ما بتصلكم قال أيه طالب قروش عشان يوصل منشوراتنا ليكم .. تستاهلو يدفعو عشانكم قروش .. لكن المشكلة قال ما بقبل مننا قروش قال أيه مرتبات موظفنو اكبر من ميزانية السودان .. شفتو جنس الحقاره ?

واذا عندكم مشكلة خاصة كمان ممكن تتواصلو معانا عبر رسائل الصفحة او الحساب او البريد التحت .. المهم البريحكم
dev@azwal.com

تحياتنا ليكم زوله وزول ❤