المقاومة البكتيرية للمضادات الحيوية

· 2119

المقاومة البكتيرية للمضادات الحيوية

  مقاومة البكتريا للمضادات الحيوية خطر حقيقي علي حياة الإنسان، خاصة سكان العالم التالت الزينا البتكون فيها معظم اسباب الوفاة نتيجة للأمراض المعدية، كمثال عندنا في السودان أكبر مسبب للموت حسب منظمة الصحة هي أمراض الجهاز التنفسي، تحديدا الجهاز التنفسي السفلي و البتتطور في كتير من الحالات لحالة مميتة زي تسمم الدم.
معظم الشركات الكبيرة وقفت الابحاث في المجال دا بحجة انها ما بدر الربح الكافي، يعني الزول بستخدمها لمدة قصيرة، و هي امراض عالم تالت يعني ما سوق مربح ، و حولت خط أبحاثها لمجالات نسبة الأرباح فيها عالية زي الأمراض المزمنة السكري و ارتفاع ضغط الدم وغيرو، هنا الحكومات لازم تدخل بدعم النوع من الابحاث زي ما كانت مبادرة اوباما لعدم أبحاث تطوير المضادات الحيوية ايام فترة الرئاسية.
    السبب المباشر للمقاومة هي انه البكتريا بتطور الية دفاع ضد المضاد الحيوي بتكوين طفرة جينية و نسبتها بتزيد كل ما اتعرضت لنسبة اكبر منه نتيجة للانتخاب الطبيعي البحدث دا.
الوصفة الخاطئة و دا خطأ طبيب بالاساس، بيدي زول مضاد حيوي هو ما محتاج ليه، ودا يساهم في زيادة نسبة البكتريا البتتعرض للمضاد الحيوي و تبدا تكون طفرات..الخ.
      الحاجة التانية الإستخدام الخاطئ للمضاد الحيوي من قبل المريض، و هو انك ما تكمل كورس العلاج وتقطعه او ما بتاخده حسب الوصفة بتأخر حبة و تقدم حبة علي كيفك..الخ.
في حاجة تانية بتتعلق بمجال الغذاء بالتحديد اللحوم و الالبان و اللي بيتم اعطاء الحيوانات مضادات حيوية ممكن تنتقل لجسم الانسان بعديها و يحدس ما يحدس، زي ناس اللبن بتاعننا هنا البضيفوا البنسلين عشان اللبن ما يقطع.

العالم مقبل علي عصر الناس ح تموت فيه في غرف العمليات نتيجة للظاهرة دي، او ممكن تموت في سريرك بالتهاب حلق بسيط.